ಸ್ಫೂರ್ತಿ
                                                   ಎದೆಗುಂದದಿರು ಈ ಸೋಲಿನಿಂದ 
                                        ಗೆಲುವು ಬರುತಿದೆ ಹಿಂದಿನಿಂದ.
                                ಕಷ್ಟಗಳ ಕೊಡುತಿಹ ವಿಧಿಯು ತಾ 
                                        ಕೊಡುವ ಕೊನೆಗೆ ಮಹದಾನಂದ.


                                ಸೂರ್ಯನನು ಮೇಘಾವಳಿಯು ಮರೆ-
                                        ಮಾಚಿದರೂ ಅದು ಎಷ್ಟು ಹೊತ್ತು ?
                                ಮೋಡ ಚದುರಲು ಮತ್ತೆ ಹೊಳೆಯುವ 
                                         ಶಾಂತಿ ತಾಳು.. ಸ್ವಲ್ಪ ಹೊತ್ತು ..


                                ಛಿನ್ನವಾಗಿಹ  ಮರವು ಮತ್ತೆ  ,
                                         ಚಿಗುರುವುದು ಸರಿಸಮಯ ಬರಲು 
                                ಕ್ಷೀಣಿಸಿದ ಚಂದ್ರಮನು ಕಾಲದಿ
                                         ವರ್ಧಿಸುವ ಬೆಳದಿಂಗಳೀಯಲು


                                ಬಿಲ್ಲ ಹೆದೆಯೇರಿಸಿದ ಶರವನು 
                                         ಹಿಂದಕೆಳೆವರು,ಏಕೆ ಹೇಳು ?
                                ಹಿಂದಕೆಳೆದಂತೆಯತಿವೇಗದಿ 
                                         ಶರವು ಮುಂದೋಡುವುದು ಕೇಳು ..


                                ಅಂಜದಲೇ   ಆಪತ್ತುಗಳಿಗೆ,
                                         ಮುಂದೆ ನಡೆವನೆ ನೈಜ ಧೀರನು 
                                ಕ್ಷಣಿಕ ಕಷ್ಟವ ಎದುರಿಸಲು, 
                                          ನೀ  ಪಡೆವೆ ನಿಜದಿ, ಜಯವನು..

       ಚಿತ್ರ ಕೃಪೆ :-astrologyweekly.com