ಹಂಬಲ..

           

                          ಎಣಿಕೆಯಿಲ್ಲದೆ ಕಲ್ಲು ಎಸೆದು ಬರಿದಾಗಿಹುದು
                          ಉಳಿದದ್ದು ನಾನೀಗ ಕುಳಿತಿರುವ ಬಂಡೆ..
                          ದಾಸವಾಳದ ಸೂರ್ಯ, ಗಗನಗರ್ಭದಿ ಲೀನ
                          ನೀನು ಜೊತೆಯಿರದೆ, ನೀರವತೆಯಲಿ ದಂಡೆ..

                          ನೂಪುರದ ಇನಿದನಿಯ ತೆರೆಯ ಹಂಬಲದಲ್ಲಿ,
                          ಭೋರ್ಗರೆವ ತೆರೆಗಳದೂ ಮೌನಗೀತೆ..
                          ಜಡನದಿಯು ಸಾಗರವ ಸೇರಲುತ್ಸುಕವಿಹುದು,
                          ಭೇಟಿಗೊಮ್ಮೆಯೂ ಬರದೆ, ಏಕೆ ಕುಳಿತೆ.??!!

                          ನೀನಿರದ ಬೇಸರದ ಭಾವತೀವ್ರತೆಯಲ್ಲಿ
                          ಕಣ್ಣ ಕೊಳ ತುಳುಕಾಡಿ, ಕೆನ್ನೆ ತೇವ..
                          ಮರದ ಜೋಡಿಯ ಹಕ್ಕಿ ಕೆಣಕಿಹುದು ಏಕಾಂತ,
                          ನೋಟದಲೆ ಹುದುಗಿಸಿಹೆ, ಒಡಲ ನೋವ..

                          ತಲ್ಲಣಿಸುವಂತೆ ಮನ ಮಾಡಿರುವೆ ನೀ ಗೆಳತಿ,
                          ಹೇಳು ಬೇಗನೆ ಮುಂದೆ ನನ್ನ ಪಾಡೇನು.?
                          ಎದೆಯೊಳಗೆ ಪೂಜಿಸಲು, ಒಲವಸುಮವಿರಿಸಿರುವೆ,
                          ತಡವಿರದೆ ಗುಡಿಯೊಳಗೆ ಬರಬೇಕು ನೀನು..!!!


( ಚಿತ್ರಕೃಪೆ -- 123rf.com )