ಆಂತರ್ಯ 

                      
                      ಎದೆಯ ಭಾವದ ಲೋಕ,

                      ಅವಳ ಸ್ಪರ್ಶದಿ ನಾಕ.,

                      ಸಿಂಗರಿಸಿ ಸಂಭ್ರಮಿಪ, ಉತ್ಸವವಿದು..

                      ಹೃದಯಮಂಟಪ ದೈವ,

                      ಕರುಣಿಸಿಹಳೀ ಒಲವ,

                      ತಪ್ತ ಮನಸಿನ, ಪ್ರೇಮಪೂಜೆಗೊಲಿದು...

                      ನದಿದಡದ ತುಸು ಗಾಳಿ,

                      ಬರುತಲಿಹುದಲೆ ತೇಲಿ,

                      ನಿನ್ನ ಕಾಲ್ಗೆಜ್ಜೆ ದನಿ ; ಪ್ರಣಯ ಕವನ..

                      ಬಾಹುವಿನ ಬಂಧನಕೆ,

                      ತೆರೆದು ಹಾರಿದೆ ಬಯಕೆ.,

                      ನಿನ್ನೊಲುಮೆ ಗೂಡೆನ್ನ, ಭವ್ಯಭವನ...

                      ಕಾಲ ಹೊರಳಲು ಸಹಜ,

                      ದೊರೆತ ಭಾಗ್ಯದ ಖನಿಜ.,

                      ಕಡಲ ಗರ್ಭದ ಮುತ್ತು-ರತ್ನದಂತೆ..

                      ಯಾವ ದಾರಿಯ ಬಳಸಿ,

                      ಬಂದೆ ನೀ ನನ್ನರಸಿ !

                      ಸ್ವಪ್ನ-ಚಲನೆಯು ಮೀನಹೆಜ್ಜೆಯಂತೆ...

( ಈ ಹಾಡು " ಉಲ್ಲಾಸ ಉತ್ಸಾಹ " ಚಿತ್ರದ , " ಚಲಿಸುವ..ಚೆಲುವೇ.. ಒಲಿಸಲು.. ಬರುವೆ.." ಎಂಬ ಹಾಡಿನ ರಾಗದಲ್ಲಿ ಬರೆದ ಹೊಸ ಸಾಹಿತ್ಯ )                   

                    ಚೆಲುವೆಯೇ ನೀ ನನಗೆ... ಒಲಿದಿಹೆ ಈ ಘಳಿಗೆ...

                    ನಾ ನೋಡಿದರೆಲ್ಲೇ ನಲ್ಲೆ, ಕ್ಷಣದಲೇ ಬರುವೆ ನೀನೇನೇ ಕಣ್ಮುಂದೆ...   ಚೆಲುವೇ..

                    ನೀ ಮಲ್ಲಿಗೆಮಾಲೆ ಬಾಲೆ, ನಗುತಲೇ ಮರೆವೆ ನಾ ನನ್ನೇ ನಿನ್ಮುಂದೆ...  ಚೆಲುವೇ..

                             ಎದೆಯ ಬಯಲಿಗೆ ಹಸಿರಂತೆ , ನೀ ಬರುವೆ 

                             ಅಂದಕೆ ಹೆಸರಂತೆ , ನೀನಿರುವೆ 

                             ಚಂದದ ನೆನಪನ್ನ , ನೀ ತರುವೆ 

                             ನನ್ನ ಮನಕೆ ಒಮ್ಮೆಲೇ..

                             ಕನಸಿನಿಳೆಯಲಿ ಮಳೆಯಂತೆ , ನೀನಿಳಿವೆ

                             ಹುಣ್ಣಿಮೆ ಕಳೆಯಂತೆ , ನೀ ಹೊಳೆವೆ 

                             ಕಣ್ಣಲೇ ನನ್ನನ್ನ , ನೀ ಸೆಳೆವೆ 

                             ನಿನ್ನ ಮನಕೆ ಒಮ್ಮೆಲೇ..

                    ಮನಸು.. ಹೊಸದಾದಂತೆ.. ಮನಸಾಗಿದೆ...||

                    ಕೇಳಲೆಂದೇ ಸವಿನುಡಿಯ , ಜೀವವೀಗ ತುಡಿಯುತಿದೆ 

                    ನುಡಿಯುತಲೇ.. ತಣಿಯುವೆನು...

                    ನೂರು ಬಾರಿ ನವಿರೆದೆಯ , ಭಾವವೀಣೆ ಮಿಡಿಯುತಿದೆ 

                    ನೆನೆಯುತಲೇ.. ಪ್ರಣಯವನು...

                    ಹೂದುಂಬಿ ಹಾಗೆ ನಾವು ಸೇರೋಣ...

                    ಸುರಿವಂತೆ ಜೆನಧಾರೆ ಕೂಡಿ ಹಾಡೋಣ.... 

                          ಎದೆಯ ಬಯಲಿಗೆ ಹಸಿರಂತೆ , ನೀ ಬರುವೆ 

                          ಅಂದಕೆ ಹೆಸರಂತೆ , ನೀನಿರುವೆ 

                          ಚಂದದ ನೆನಪನ್ನ , ನೀ ತರುವೆ 

                          ನನ್ನ ಮನಕೆ ಒಮ್ಮೆಲೇ..

                          ಕನಸಿನಿಳೆಯಲಿ ಮಳೆಯಂತೆ , ನೀನಿಳಿವೆ

                          ಹುಣ್ಣಿಮೆ ಕಳೆಯಂತೆ , ನೀ ಹೊಳೆವೆ 

                          ಕಣ್ಣಲೇ ನನ್ನನ್ನ , ನೀ ಸೆಳೆವೆ 

                          ನಿನ್ನ ಮನಕೆ ಒಮ್ಮೆಲೇ..

                    ಮನಸು.. ಹೊಸದಾದಂತೆ.. ಮನಸಾಗಿದೆ...||

                    ಚೆಲುವೆಯೇ ನೀ ನನಗೆ... ಒಲಿದಿಹೆ ಈ ಘಳಿಗೆ...||

                    ಕಾಣಲಿಲ್ಲ ಹುಡುಕಿದರೂ , ಕನ್ಯೆ ನಿನ್ನ ಸರಿಸಮರು 

                    ಚೆಲುವಿನಲಿ.. ಭುವನದೊಳು...

                    ಜಾಣ ನೀನೆ ಪ್ರತಿಯುಸಿರು , ಎಂದೂ ನನ್ನ ಜೊತೆಯಲಿರು 

                    ಜನುಮದಲಿ.. ಹಗಲಿರುಳು...

                    ಬಾನಲ್ಲಿ ತೇಲೋ ಹಕ್ಕಿ ಆಗೋಣ...

                    ಬಿಡದಂತೆ ಅಪ್ಪಿಕೊಂಡು ಹಾರಿಹೊಗೋಣ....

                          ಎದೆಯ ಬಯಲಿಗೆ ಹಸಿರಂತೆ , ನೀ ಬರುವೆ 

                          ಅಂದಕೆ ಹೆಸರಂತೆ , ನೀನಿರುವೆ 

                          ಚಂದದ ನೆನಪನ್ನ , ನೀ ತರುವೆ 

                          ನನ್ನ ಮನಕೆ ಒಮ್ಮೆಲೇ..

                          ಕನಸಿನಿಳೆಯಲಿ ಮಳೆಯಂತೆ , ನೀನಿಳಿವೆ

                          ಹುಣ್ಣಿಮೆ ಕಳೆಯಂತೆ , ನೀ ಹೊಳೆವೆ 

                          ಕಣ್ಣಲೇ ನನ್ನನ್ನ , ನೀ ಸೆಳೆವೆ 

                          ನಿನ್ನ ಮನಕೆ ಒಮ್ಮೆಲೇ..

                    ಮನಸು.. ಹೊಸದಾದಂತೆ.. ಮನಸಾಗಿದೆ...||

                    ಚೆಲುವೆಯೇ ನೀ ನನಗೆ... ಒಲಿದಿಹೆ ಈ ಘಳಿಗೆ...||

                                 

                                   ಪ್ರಣಯ ಲಹರಿ

                                     ನನ್ನ ಬಾಳಿನ ಬಾನಿನೊಳು ಚಂದ್ರನಂತೆ 

                                     ನೀನಿರಲು ಎದೆತುಂಬ ಬೆಳಕ ತೆರೆಯು..

                                     ಪ್ರೀತಿದೋಣಿಯಲಿಂದು ಜೊತೆಗಾತಿ ನೀನಿರಲು 

                                     ಜೀವನದ ಕಡಲೀಗ ಪುಟ್ಟ ತೊರೆಯು...

                                     ನಿನ್ನ ಮೃದುನಗು ಸುರಿವ, ಕಿರಣ ಸೋಕಲು ಬಿರಿವ 

                                     ತಾವರೆಯ ಹೂವಿಂದು, ನನ್ನ ಮನಸು..

                                     ದೃಷ್ಟಿಯಿರೆ ನನ್ನೆಡೆಗೆ, ಆನಂದ ಸಿರಿ ಎದೆಗೆ;

                                     ಕನಸು ಮೂಡಲು ಕ್ಷಣವೂ, ಬದುಕು ಸೊಗಸು...

                                     ಹೃದಯದಂಗಳ ತುಂಬ, ನಿನ್ನದೇ ಮೊಗಬಿಂಬ 

                                     ರಂಗೋಲಿಯಂದದಲಿ ನಿನ್ನ ಹೆಸರು..

                                     ಮನದ ಕದ ತೆರೆದಂತೆ, ನವ್ಯ ಭಾವದ ಸಂತೆ;

                                     ನಿನ್ನೊಲುಮೆ ವರ್ಷದಲಿ, ಜೀವ ಹಸಿರು...

                                     ಹರುಷಕಲ್ಲದ ಹೊರತು, ನಿನ್ನ ಕಂಬನಿ ಗುರುತು 

                                     ಇರದಂತೆ ನಾನೆಂದೂ ಕಾಪಿಡುವೆನು..

                                     ಒಲವಪಯಣದಲಿಂತು, ಮರವಾಗಿ ನಾ ನಿಂತು 

                                     ಹೆಜ್ಜೆ ಹೆಜ್ಜೆಗೂ ನೆರಳನೀದು ನಡೆಸುವೆನು...

ಚಿತ್ರಕೃಪೆ-- dovezoepo.blogspot.com

               
                                       ಮಲೆನಾಡು 

                                     ರುದ್ರ-ರಮಣೀಯತೆಯ ಪಶ್ಚಿಮದ ಘಟ್ಟ,

                                     ದಟ್ಟ ಹಸಿರನು ಉಟ್ಟ ಮಲೆನಾಡ ಬೆಟ್ಟ.

                                     ಸುರಲೋಕ ಧರೆಗಿಳಿದು ಬಂದಂಥ ಭಾವ,

                                     ಪ್ರತಿನೋಟದಲೂ ಪುಳಕಗೊಂಡಿಹುದು ಜೀವ...

                                     ನಿತ್ಯ-ನಿರ್ಮಲ-ರಮ್ಯ ಝರಿ-ತೊರೆಯ ಬಳುಕು,

                                     ಪ್ರತಿಹೊದರಿನಲೂ ಪಕ್ಷಿ ಚಿಲಿಪಿಲಿಯ ಪಲಕು.

                                     ಬಗೆಬಗೆಯ ಮೃಗ-ಮಿಗ-ವಿಹಂಗಗಳ ಸೊಬಗು,

                                     ಪ್ರಕೃತಿಮಾತೆಯ ಸೃಷ್ಟಿ ಕಲೆಯ ಹೊಮ್ಮೆರಗು...

                                     ಸತತ ಸೋನೆಯ ರಾಗ ಹಾಡುತಿಹ ಜಡಿ-ಮಳೆ,

                                     ಲಯದಿ ಹನಿಗಳು ಇಳಿಯೆ ಗಂಧ ಸೂಸಿದೆ ಇಳೆ.

                                     ತಂಗಾಳಿ ಬೀಸಿರಲು ಮರದೆಲೆಗಳ ತಾಳ,

                                     ನೆರೆದಿಹುದು ಇಲ್ಲೊಂದು ಸಂಗೀತ ಮೇಳ...

                                     ಸೂಜಿಗಲ್ಲಿನ ತೆರದಿ ಸೆಳೆಯುತಿದೆ ಮನವ,

                                     ಚಿಮ್ಮಿಸುತಲಿದೆ ತನುವಿನೊಳಗೆ ಹೊಸತನವ.

                                     ವೃಕ್ಷಗಳು ಚಾಚಿರುವ ರೆಂಬೆಗಳು ಇಂದು,

                                     ಕರೆಯುತಿವೆ ಪಯಣಿಗನ ಮತ್ತೆ ಬಾ ಎಂದು... 

ಚಿತ್ರಕೃಪೆ--skyscrapercity.com

( ಈ ಹಾಡು " ಮನಸಾರೆ " ಚಿತ್ರದ , " ಎಲ್ಲೋ ಮಳೆಯಾಗಿದೆ ಎಂದು " ಎಂಬ ಹಾಡಿನ ರಾಗದಲ್ಲಿ ಬರೆದ ಹೊಸ ಸಾಹಿತ್ಯ )

            ನಿಂದೇ ನವಿರಾಗಿಹ ಕನಸು ಬಲವಾಗಿ ಕಾಡುತಿದೆ..

            ಇಂದೇ ಸವಿಯಾಗಿಹ ಮನಸು ಒಲವಾಗಿ ಹಾಡುತಿದೆ...|

            ಹೊಸ ರಂಗನು ಬದುಕಿನ ಭಿತ್ತಿಯಲಿ, ಚೆಲ್ಲುತ ನೀ ಸೆಳೆದೆ

            ನಿನ್ನ ಗುಂಗಿನಲಿರುವ ವೃತ್ತಿಯಲಿ , ಮೆಲ್ಲಗೆ ನಾನಿಳಿದೆ.....||

            ನಿನ್ನನು ನೋಡಿದ ರಸಘಳಿಗೆ, 
            ತೇಲಿದೆ ನಾ ಮುಗಿಲಿನಲಿ..

            ನೀಡಿದೆ ನೀನು ಅರಿವಳಿಕೆ, 
            ಹೂಮೊಗದ ನಗುವಿನಲಿ ......

               ಅಪಹಾರವ ಮಾಡಿದೆ ಕ್ಷಣದೊಳಗೆ,

                        ಹೃದಯವ ಸುಳಿವಿಡದೆ..

               ಪರಿಹಾರವ ನೀಡಲೇಬೇಕೆನಗೆ,

                         ಸನಿಹವೇ ಇರು ಬಿಡದೆ...|| ೧ ||

             ನಿಂದೇ ನವಿರಾಗಿಹ ಕನಸು ಬಲವಾಗಿ ಕಾಡುತಿದೆ..

             ಇಂದೇ ಸವಿಯಾಗಿಹ ಮನಸು ಒಲವಾಗಿ ಹಾಡುತಿದೆ...

             ಹೊಮ್ಮಿದೆ ಸುಂದರ ಸೂಚನೆಯು,

             ಕಣ್ಣೊಳಗೆ ಪ್ರೀತಿಯದೇ..

             ತುಂಬಿದೆ ಬಂಧುರ ಭಾವನೆಯು, 

             ನನ್ನೊಳಗೆ ನಿನ್ನಯದೇ ......

                ನಿನ್ನ ನಾಮವ ಜಪಿಸುತ ಹರ್ಷದಲಿ,

                           ನನ್ನೆದೆ ಕುಣಿಯುತಿದೆ ..

                ಈ ಪ್ರೇಮದ ಅಲೆಗಳ ಸ್ಪರ್ಶದಲಿ,

                            ಜೀವವು ತಣಿಯುತಿದೆ ...  || ೨ ||

            ನಿಂದೇ ನವಿರಾಗಿಹ ಕನಸು ಬಲವಾಗಿ ಕಾಡುತಿದೆ..

            ಇಂದೇ ಸವಿಯಾಗಿಹ ಮನಸು ಒಲವಾಗಿ ಹಾಡುತಿದೆ...|

            ಹೊಸ ರಂಗನು ಬದುಕಿನ ಭಿತ್ತಿಯಲಿ, ಚೆಲ್ಲುತ ನೀ ಸೆಳೆದೆ

            ನಿನ್ನ ಗುಂಗಿನಲಿರುವ ವೃತ್ತಿಯಲಿ , ಮೆಲ್ಲಗೆ ನಾನಿಳಿದೆ....||

( ಈ ಹಾಡು " ಮುಂಗಾರು ಮಳೆ " ಚಿತ್ರದ, " ಅನಿಸುತಿದೆ ಯಾಕೋ ಇಂದು " ಎಂಬ ಹಾಡಿನ ರಾಗದಲ್ಲಿ ಬರೆದ ಹೊಸ ಸಾಹಿತ್ಯ )

                 ಕರೆಯುತಿದೆ ನನ್ನ ನಯನ,

                 ಹೃದಯ ಮಂದಿರಕೆ ನಿನ್ನ..

                 ಪ್ರೇಮದ ಈ ಸಿಹಿ ಪಯಣ,

                 ನಡೆವೆಯಾ, ಜೊತೆಯಲಿ ನನ್ನ..

                    ನಿನ್ನ..ಕುರಿತೇ ಎಲ್ಲ ಯೋಚನೆ...

                  ಕ್ಷಣಕೂ ನವ್ಯ ಭಾವನೆ ತರುವ..

                        ಪ್ರೀತಿ ಹೀಗೇನೇ.....||

                 ಕರೆಯುತಿದೆ ನನ್ನ ನಯನ.....

                 ಸುಮಗಳ ಎಸಳಿನ ತುಟಿಯಲಿ, ನಿಲ್ಲದ ನಗುವಿದೆ..

                 ರವಿಸಮ ಮೊಗದಲಿ ಮುಗಿಯದ ಕಾಂತಿಯ ಸೊಗಸಿದೆ..

                 ಗಗನದಿ ಕಾಣದ ತಾರೆಯೊಂದ ಭುವಿಯಲಿ ಹಗಲೇ ಕಂಡಿರುವೆ..

                    ನೀನೇ ಮನದಿ ನಿಂತ ಕಲ್ಪನೆ..

                 ನಿನ್ನ ಒಲವ ಧಾರೆಗೆ ತುಡಿವ..

                        ಪ್ರೀತಿ ಹೀಗೇನೇ...|| ೧ ||

                 ಕರೆಯುತಿದೆ ನನ್ನ ನಯನ......

                 ಸುಮಧುರ ಕನಸಿನ ಎಳೆಯಲಿ ಬದುಕನೇ ನೇದಿಹೆ..

                 ಎದೆಯಾಳದಿ ಹೊಳೆವ ದೀಪದಿ ನಿನ್ನನೇ ನೋಡಿಹೆ..

                 ಸಾವಿರ ಜನ್ಮಕೂ ನೀನೆ ನನ್ನ ಹೃದಯವನಾಳಲು ಬಯಸಿರುವೆ..

                       ಇದೇ ವಿಧಿಗೂ ಮನದ ಯಾಚನೆ..

                    ನಿನ್ನನಗಲಿ ಇರುವುದನರಿಯೇ..

                           ಪ್ರೀತಿ ಹೀಗೇನೇ...|| ೨ ||

                  ಕರೆಯುತಿದೆ ನನ್ನ ನಯನ,

                  ಹೃದಯ ಮಂದಿರಕೆ ನಿನ್ನ..

                  ಪ್ರೇಮದ ಈ ಸಿಹಿ ಪಯಣ,

                  ನಡೆವೆಯಾ, ಜೊತೆಯಲಿ ನನ್ನ..

                      ನಿನ್ನ..ಕುರಿತೇ ಎಲ್ಲ ಯೋಚನೆ...

                    ಕ್ಷಣಕೂ ನವ್ಯ ಭಾವನೆ ತರುವ..

                        ಪ್ರೀತಿ ಹೀಗೇನೇ.....||

  ( ಈ  ಹಾಡು  " ಸಂಗಮ " ಚಿತ್ರದ  " ಮಧುಮಾಸ ಅವಳಿಗೆ ಖಾಸ " ಎಂಬ ಹಾಡಿನ ರಾಗದಲ್ಲಿ ಬರೆದ ಹೊಸ ಸಾಹಿತ್ಯ )            

                          ಬದುಕಲ್ಲಿ ನೂತನ ಭಾಸ 

                          ತನುವಲ್ಲಿ ರಮ್ಯ ವಿಲಾಸ

                          ಮನದಲ್ಲಿ ಪ್ರೇಮ ವಿಕಾಸ 

                          ಆಕೆ ನೆನಪಲ್ಲಿ .....

                          ಬೆಳದಿಂಗಳೇ ಅವಳ ಹಾಸ 

                          ನಡಿಗೆಯಲಿ ಬೆಳ್ಳನೆ ಹಂಸ 

                          ಕಳಿಬೇಕು ನೂರು ತಾಸ

                          ಆಕೆ ನೆನಪಲ್ಲಿ...

                          ನಿಂತರೆ ..ಬೇಲೂರು ಶಿಲ್ಪ ಉರುಳಬೇಕು..

                          ಸುತ್ತಲೂ.. ಹತ್ತಾರು ದುಂಬಿ ಹೊರಳಬೇಕು ..

                          ಅವಳನ್ನೇ ನೋಡುತ್ತಾ ಕವಿಗಳೇ ದಣಿಬೇಕು...

                          ನನ್ನವಳು..sss 

                          ನನ್ನವಳು.. ಬರೆಯದ ಸೌಂದರ್ಯದ ಸಾಲು 

                          ನನ್ನವಳು.. ಜೊತೆಯಾಗೆ ಸ್ವರ್ಗಕೂ ಸೋಲು ||

              ಕಂಗಳ ಹೊಳಪು ನೋಡಿಯೇ ತಾವರೆ ಬರಿ ನಾಚಿ ನಾಚಿ ಮುದುಡಲುಬೇಕು ..

              ಕೆನ್ನೆಗೆ ಸಿಹಿ ಮುತ್ತಿಕ್ಕಲು..ಗಾಳಿಯೂ ಓಡಿ ಓಡಿ ಹಿಂಬರಲುಬೇಕು ...

                               ಚೆಲು ಚೆಲು ಚೆಲು ಚೆಲುವಿನ ಬಳ್ಳಿ 

                               ಚಿಲಿ ಪಿಲಿ ಚಿಲಿ ಕಲರವದಲ್ಲಿ 

                               ಕುಲು ಕುಲು ಕುಲು ನಗೆಯ ಚೆಲ್ಲಿ 

                                  ಮನವ.. ಸೆಳೆದು ..ಬಿಡಬೇಕು ...

                               ಹಿಮ ಹಿಮ ಹಿಮ ತುಸು ಮಂಜಲ್ಲಿ 

                               ಚುಮು ಚುಮು ಚುಮು ನಸುಬೆಳಕಲ್ಲಿ

                               ಘಮ ಘಮ ಘಮ ಎಸಳಿನ ಮಲ್ಲಿ 

                                  ಅರಳೋ.. ಹಾಗೆ ಇರಬೇಕು.. ಅವಳು .......||೧||

                          ನನ್ನವಳು ..ಬರೆಯದ ಸೌಂದರ್ಯದ ಸಾಲು..

                          ನನ್ನವಳು ..ಜೊತೆಯಾಗೆ ಸ್ವರ್ಗಕೂ ಸೋಲು ..||

              ಸುಂದರ ಭವ್ಯ ತೇರೋಳು ಆಕೆಯು ಬಾನೊಳಗೆ ಹಾರಿ ವಿಹರಿಸಬೇಕು ..

              ಕಾಣದ ಸುರರ ಲೋಕದಿ ಹೂಗಳು ಅವಳಡಿಗೆ ಎರಗಿ ವಿರಮಿಸಬೇಕು ...

                               ಸರ ಸರ ಸರ ಸರಿಯೋ ಮೇಘ 

                               ಭರ ಭರ ಭರ ಸುರಿಯೋ ಜೋಗ 

                               ಗರ ಗರ ತಿರುಗೋ ಭೂಭಾಗ 

                                  ನಿಲಿಸೋ.. ಚೆಲುವೆ.. ಇರಬೇಕು...

                               ಥಳ ಥಳ ಥಳ ಥಳಿಸೋ ರನ್ನ 

                               ಫಳ ಫಳ ಫಳ ಹೊಳೆಯೋ ಚಿನ್ನ 

                               ತಳ ಮಳ ತಳ ಮಳಿಸೋ ನನ್ನ 

                                   ಒಲಿಸಿ.. ತಣಿಸೋ ಬೆಡಗಿ.. ಇರಬೇಕು.....||೨||

   

                          ನನ್ನವಳು.. ಬರೆಯದ ಸೌಂದರ್ಯದ ಸಾಲು..

                          ನನ್ನವಳು.. ಜೊತೆಯಾಗೆ ಸ್ವರ್ಗಕೂ ಸೋಲು .....||

         
                                      ಬೆಳದಿಂಗಳು 

                                           ಎಂತು ವರ್ಣಿಸಲಿ ಚಂದ್ರಿಕೆಯ ಚೆಲುವು.

                                           ಸುಂದರದ ರಾತ್ರಿಯಲಿ ಚಂದ್ರಮನ ಒಲವು.

                                           ಚುಕ್ಕಿಗಳ ತೋರಣವು ಗಾಢಕೃಷ್ಣತೆಯಲ್ಲಿ,

                                                ಮುಸುಕಿ ಮರೆಯಾಗುತಿಹ ಮೇಘಗಳ ಮಾಯೆ.

                                           ಶುಭ್ರ ಬೆಳದಿಂಗಳ ಬೆಳಕ ವಿಸ್ತರಣೆಯಲಿ,

                                                ಮೂಡಿಹುದು ಬಾನೊಳಗೆ ಉತ್ಸವದ ಛಾಯೆ..

                                           ಸೂರ್ಯನಿರುವಿಕೆಯಲ್ಲಿ ಬಳಲಿ ಹೋಗಿವೆ ಬೇಗ,

                                                ಕುಮುದಸಂಚಯವು ಝಳ-ತಾಪದಲಿ ಬೆಂದು.

                                           ಮಂದ ಶೀತಲ ಶಶಿಯು ನಗುತ ಉದಿಸಲು ಈಗ 

                                                ಎಲ್ಲೆಡೆಗೂ ಕಂಪೆಸೆದು ನಿಂತಿಹವು ಬಿರಿದು..

                                           ದಿನವಿಡೀ ಚಡಪಡಿಸಿ ಪ್ರಿಯಕರನ ಸನಿಹಕ್ಕೆ,

                                                ಈ ಚಕೋರಗಳು ಕಾದು ಕುಳಿತಿಹವು.

                                           ಆಗಸದಿ ಸೌಮ್ಯಭೇಶನ ಪ್ರಭೆಯ ಸಂಭ್ರಮಕೆ,

                                                ಹರ್ಷನಿರ್ಭರವಾಗಿ ಕುಣಿದಾಡುತಿಹವು..

                                           ತಿಳಿನೀರಿನಲಿ ಚಂದ್ರ ಬಿಂಬವನು ಕಂಡಿಲ್ಲಿ,

                                                ಹಿಡಿಯಲು ಮೇಲೇರಿ ಆಡುತಿವೆ ಮೀನು.

                                           ದಿನವೆಲ್ಲ ದಣಿದು, ಈ ರಮ್ಯ ನೀರವತೆಯಲಿ,

                                                ಹೊಂಗನಸಿನೊಳು ಸುಪ್ತ, ಜಗವು ತಾನು..

                                            ಯಾರು ಕೊಟ್ಟಿಹರು?! ಆಕಾಶದೊಡೆಯಗೆ ಇಂಥ 

                                                 ರಜತ ಕಾಣಿಕೆಯನ್ನು ಸದ್ದಿಲ್ಲದಂತೆ..

                                            ಮಧುರ ಬೆಳಕನು ಈವ ವೃತ್ತಬೊಂಬೆಯು ಸ್ವಂತ 

                                                 ಸೃಷ್ಟಿಕರ್ತನ ಭವ್ಯ ಕಲೆಯ ಸಂತೆ ..

ಚಿತ್ರಕೃಪೆ--arch0708.goldtent.net

( ಈ ಹಾಡು " ಕೃಷ್ಣನ್ ಲವ್ ಸ್ಟೋರಿ " ಚಿತ್ರದ  " ಸಂತೆಯಲ್ಲೇ ನಿಂತರೂನು " ಎಂಬ ಹಾಡಿನ ರಾಗದಲ್ಲಿ ಬರೆದ ಹೊಸ ಸಾಹಿತ್ಯ ..)        
          
          ನಲ್ಲೆ ನಿನ್ನ ಕಣ್ಣಿನಲ್ಲೇ ....

          ನಲ್ಲೆ ನಿನ್ನ ಕಣ್ಣಿನಲ್ಲೇ ಕಂಡೆ ಈಗ ನನ್ನನ್ನೇ..

          ನಿನ್ನ ಹಾಗೆ ಯಾರು ಇಲ್ಲ, ಮೆಚ್ಚಿಕೊಂಡೆ ನಿನ್ನನ್ನೇ..

          ಒಂದೇ ಸಾರಿ ನೋಡಿ ಈಗ ನನ್ನ ತುಂಬಾ,

          ತುಂಬಿಕೊಂಡೆ ನಿನ್ನನ್ನೇ..

          ಒಪ್ಪಿಕೊಂಡೆ ನಿನ್ನನ್ನೇ..

          ನೀನೂ ಅಪ್ಪಿಬಿಡು ನನ್ನನ್ನೇ.....

          ಪ್ರಣಯವೇ ತಣಿಸಿದೆ ನನ್ನನೇ..

          ನೆನೆಯುತ ಪ್ರತಿಕ್ಷಣ ನಿನ್ನನೇ..

          ಎದೆಯಲಿ ನಿನ್ನಯ .. ನಡೆ ನುಡಿ ತುಂಬಿದೆ ..

          ಒಲವಿನ ನಾದವೇ ಈ, ಉಸಿರಲಿ ಹೊಮ್ಮಿದೆ...||

          ಪ್ರಣಯವೇ ತಣಿಸಿದೆ ನನ್ನನೇ... ನೆನೆಯುತ ಪ್ರತಿಕ್ಷಣ ನಿನ್ನನೇ..|

          ನೋಟದಲೆ.. ಬಂಧಿಸುವ.. ಪ್ರೀತಿಯಿದು ಹೀಗೆ ..

          ತೋಟದಲಿ .. ಗಂಧಿಸುವ .. ಹೂವುಗಳ ಹಾಗೆ ..

               ನಿನ್ನಯ.. ಭೇಟಿಗೆ.. ಕಾದಿಹೆ.. ನಾನು..

               ಕಾಡದೆ.. ಕೂಡಲೇ.. ಸೇರುಬಾ.. ಇನ್ನು..

               ನೀನೆ ಇರುವಲ್ಲಿ... ಬೇರೆ ಬೇಕೇನು..?! ||೧||

          ಪ್ರಣಯವೇ.....

          ಪ್ರಣಯವೇ ತಣಿಸಿದೆ ನನ್ನನೇ... ನೆನೆಯುತ ಪ್ರತಿಕ್ಷಣ ನಿನ್ನನೇ..| 

     

          ಮಾನಸದ.. ಮಂದಿರದ.. ಭಾವಗಳು ಸೇರಿ...

          ಆಗಸದ.. ಚಂದಿರನ .. ಮೀರುತಿವೆ ಹಾರಿ..

             ನನ್ನಯ.. ದೇಹಕೆ.. ಜೀವ ನೀನಿಂದು..

             ಪ್ರೀತಿಯ.. ಯಾನಕೆ.. ನಾವೆ ಆಗಿಂದು..

             ಸುತ್ತುವ.. ಕೂಡಿ.. ಭೂಮಿ ಮೇಲಿಂದು....||೨||

          ಪ್ರಣಯವೇ.......

          ಪ್ರಣಯವೇ ತಣಿಸಿದೆ ನನ್ನನೇ... ನೆನೆಯುತ ಪ್ರತಿಕ್ಷಣ ನಿನ್ನನೇ..| 

          ಎದೆಯಲಿ ನಿನ್ನಯ .. ನಡೆ ನುಡಿ ತುಂಬಿದೆ ..

          ಒಲವಿನ ನಾದವೇ ಈ, ಉಸಿರಲಿ ಹೊಮ್ಮಿದೆ...||||