ಬೆಳದಿಂಗಳು 

                                           ಎಂತು ವರ್ಣಿಸಲಿ ಚಂದ್ರಿಕೆಯ ಚೆಲುವು.

                                           ಸುಂದರದ ರಾತ್ರಿಯಲಿ ಚಂದ್ರಮನ ಒಲವು.

                                           ಚುಕ್ಕಿಗಳ ತೋರಣವು ಗಾಢಕೃಷ್ಣತೆಯಲ್ಲಿ,

                                                ಮುಸುಕಿ ಮರೆಯಾಗುತಿಹ ಮೇಘಗಳ ಮಾಯೆ.

                                           ಶುಭ್ರ ಬೆಳದಿಂಗಳ ಬೆಳಕ ವಿಸ್ತರಣೆಯಲಿ,

                                                ಮೂಡಿಹುದು ಬಾನೊಳಗೆ ಉತ್ಸವದ ಛಾಯೆ..

                                           ಸೂರ್ಯನಿರುವಿಕೆಯಲ್ಲಿ ಬಳಲಿ ಹೋಗಿವೆ ಬೇಗ,

                                                ಕುಮುದಸಂಚಯವು ಝಳ-ತಾಪದಲಿ ಬೆಂದು.

                                           ಮಂದ ಶೀತಲ ಶಶಿಯು ನಗುತ ಉದಿಸಲು ಈಗ 

                                                ಎಲ್ಲೆಡೆಗೂ ಕಂಪೆಸೆದು ನಿಂತಿಹವು ಬಿರಿದು..

                                           ದಿನವಿಡೀ ಚಡಪಡಿಸಿ ಪ್ರಿಯಕರನ ಸನಿಹಕ್ಕೆ,

                                                ಈ ಚಕೋರಗಳು ಕಾದು ಕುಳಿತಿಹವು.

                                           ಆಗಸದಿ ಸೌಮ್ಯಭೇಶನ ಪ್ರಭೆಯ ಸಂಭ್ರಮಕೆ,

                                                ಹರ್ಷನಿರ್ಭರವಾಗಿ ಕುಣಿದಾಡುತಿಹವು..

                                           ತಿಳಿನೀರಿನಲಿ ಚಂದ್ರ ಬಿಂಬವನು ಕಂಡಿಲ್ಲಿ,

                                                ಹಿಡಿಯಲು ಮೇಲೇರಿ ಆಡುತಿವೆ ಮೀನು.

                                           ದಿನವೆಲ್ಲ ದಣಿದು, ಈ ರಮ್ಯ ನೀರವತೆಯಲಿ,

                                                ಹೊಂಗನಸಿನೊಳು ಸುಪ್ತ, ಜಗವು ತಾನು..

                                            ಯಾರು ಕೊಟ್ಟಿಹರು?! ಆಕಾಶದೊಡೆಯಗೆ ಇಂಥ 

                                                 ರಜತ ಕಾಣಿಕೆಯನ್ನು ಸದ್ದಿಲ್ಲದಂತೆ..

                                            ಮಧುರ ಬೆಳಕನು ಈವ ವೃತ್ತಬೊಂಬೆಯು ಸ್ವಂತ 

                                                 ಸೃಷ್ಟಿಕರ್ತನ ಭವ್ಯ ಕಲೆಯ ಸಂತೆ ..

ಚಿತ್ರಕೃಪೆ--arch0708.goldtent.net